إجراءات فقدان الجواز السعودي

السلام عليكم ورحمة الله وبركاته وبعد

احببت اليوم التحدث معكم عن أحد تجاربي مع الإدارات الحكومية وتحديداً جوازات الرياض. وكان الأمر الذي شجعني في الحقيقة أني لم أجد من خلال البحث على الانترنت أي من المصادر التي توضح ماهي الإجراءات المفصلة لاستخراج جواز بدل فاقد. وعند الرجوع لموقع المديرية العامة للجوازات وجدت أن إجراءات استخراج بدل الجواز الفاقد كانت تعنى فقط بتعبئة النموذج وإحضار صورة وتسديد الرسوم … الخ، ولكنها لا توضح الإجراء المفصل. كما أن محتوى المنتديات السعودية تفتقر لتفاصيل دقيقة حول هذا الإجراء. لن أطيل واليكم الإجراء بالتفصيل.

الأوراق والمستندات المطلوبة

  • تعبئة النموذج الخاص بالجوازات، ويفضل النموذج المطبوع لدى الجوازات وليس الموجود على الموقع
  • إرفاق صورتين شخصية بخلفية بيضاء مقاس 4 في 6
  • تسديد رسوم استخراج الجواز عن طريق البنك
  • صورة من بطاقة الهوية الوطنية (بطاقة الأحوال لا تفي)
  • وضع جميع المستندات في ملف أخضر بلاستيك تجده لدى محلات التصوير قرب الجوازات ويسمى بـ “ملف معاملة بدل فاقد”

بالنسبة لمن فقد الجواز داخل المملكة حسب الحالات التالية:

  • ضياع: ارفاق بلاغ من الشرطة
  • حريق: ارفاق تقرير من الدفاع المدني
  • سرقة: ارفاق بلاغ من الشرطة

أما لحالات الفقدان خارج المملكة فيتم ارفاق الورقة الخاصة بتذكرة المرور من جوازات المطار عند دخول المملكة.

الإجراءات

  • بعد تجهيز جميع المستندات تذهب إلى جوازات الرياض والله يعينك على المواقف وتكون متواجد هناك من بداية الدوام الرسمي باكرا
  • الصعود إلى الدور الأول والتوجه الى قسم فقدان الجواز السعودي، نهاية الممر تتوجه إلى اليسار وراجع آخر مكتب على اليسار
  • هناك تجد الموظف المسئول عن استقبال الطلبات ولديه نموذج فقدان الجواز. تقوم بتعبئة النموذج وإضافته للملف
  • يعطيك ورقة عليها رقم الجواز تذهب بها إلى الأرشيف بالقبو لأخذ صورة من معاملة إصدار الجواز المفقود وللتأكد من عدم وجود الجواز بالأرشيف في حال تم إيجاده وأيضاً للتأكد من عدم وجود أي ملاحظات على الشخص
  • تعود لمسئول الاستقبال والذي يقوم بالتأكد من الأوراق وتحديث حالة الجواز في نظام الجوازات إلى الفقدان وبالتالي إيقاف الجواز
  • ثم يقوم بطبع معلومات عن الجواز والسفريات الخاصة بجوازك وإرفاقها بالملف
  • تأخذ الملف للمكتب الذي خلفه وذلك لأخذ موعد للتحقيق عن كيفية فقد الجواز.
  • تعود في الوقت الذي تم تحديده لك وغالبا بعد كم يوم عندما يناديك موظف التحقيق تدخل إلى الغرفة وتقوم بتعبئة دفتر تقوم فيه بالإجابة عن بعض الأسئلة حول بكيفية فقدان الجواز، الإجراءات التي عملتها بعد الفقدان، عدد مرات فقد الجواز، سبب إصدار جواز بديل، والتعهد بالمحافظة على الجواز الجديد ..الخ
  • يقوم بعدها المحقق باعتماد الدفتر وإعطائك الملف لتذهب لمكتب المسئول الذي خلفه لاعتماد قيمة الغرامة وهي 1000 ريال للفقدان داخل المملكة و500 ريال للفقدان بالخارج
  • تعود بالملف إلى المحقق ويعطيك ورقة بها رقم لمراجعة المديرية العامة للجوازات على شارع الفرزدق تقريبا شمال معهد الإدارة
  • خلال هذه الفترة تذهب المعاملة للمديرية العامة للجوازات وتعرض على لجنة لعادة النظر في منح جواز بديل أو لا
  • بعد فترة شهر تقريبا اذهب إلى المديرية والصعود إلى المكتب السري بالدور الأول.
  • عند الشباك قم بتزويد الموظف بالرقم الذي أخذت من المحقق ليقوم بالبحث عن المعاملة وبالتالي إخبارك بقرار اللجنة وهل تمت الموافقة على منح جواز بديل وهل هناك منع من السفر ومبلغ الغرامة المالية
  • يقوم الموظف بطباعه خطاب وار فاقة إلى مدير الجوازات لاعتماده
  • تذهب إلى البنك لإصدار شيك مصرفي باسم مؤسسة النقد العربي السعودي بقيمة الغرامة
  • بعد فترة ثلاث أيام إلى أسبوع قم بالعودة إلى جوازات الرياض بالدور الأول عند مكتب الصادر والوارد الخاص بقسم فقدان الجواز السعودي واسأل عن معاملتك اذا وردت من المديرية
  • تذهب الى الصندوق بالقبو لتسليم الشيك المصرفي وأخذ وصل بذلك
  • تعود بالوصل إلى مكتب الصادر والوارد وذلك لاعتماد المبلغ على نموذج تجديد الجواز
  • قم بأخذ نماذج إصدار الجواز مع الصور ومرفق صورة الهوية والوصل والعودة إلى المكتب الثالث (بعد المحقق) بالدور الأول (مكتب الموظف الذي اعتمد الغرامة المبدئية) وذلك لتفعيل حالة الجواز بنظام الجوازات برقم الجديد
  • تذهب إلى قسم تجديد الجواز وتأخذ رقم لتسليم الأوراق وان شاء الله تستلم جوازك نهار اليوم التالي

وأخيرا بعض النصائح

  • حافظ على جوازك فالوقاية خير من العلاج
  • قد تحتاج إلى الانتظار فاشغل وقتك بذكر الله والدعاء بالتيسير
  • لابد من توفر جميع أصول الوثائق الرسمية معك في جميع الأحوال لأنك قد تحتاجها
  • لا تنسونا من صالح دعائكم
About these ads

110 ردود على إجراءات فقدان الجواز السعودي

  1. بارك الله فيك اخي العزيز ورزقك من حيث لاتحتسب اخي العزيز انا من تبوك وتم رفع المعاملة الى جوازات الرياض وأرغب في مراجعة المعاملة حيث اني مرتبط بعملية لأبنتي خارج المملكة هل سوف يتساهلون معي علما انه تم التحقيق معي في جوازات تبوك ارجو الرد بارك الله فيك

  2. azzzam قال:

    أخي الفاضل أشكر لك مرورك على الموضوع واتمنى من الله الشافي المعافي أن يرزقك وابنتك الصحة والعافية. بالنسبة لسؤالك، فيفضل ان يعلم موظف الجوازات ان فقدان الجواز كان عن طريق الخطأ وتبين التعهد الكامل بعدم ضياعه مرة ثانية. ومن الأفضل ارفاق اي بيانات تثبت السفر من أجل العملية مع الملف وتوضيح ذلك مع المعاملة وبإذن الله تتسهل أمورك. والتساهل موجود خاصة لطلاب البعثات الدراسية على سبيل المثال. اتمنى ان اكون اجبت على التساؤل وانا موحود في اي وقت وبالتوفيق أخي.

  3. تركي قال:

    اخي الكريم انا عندي مشكلة ,,, جوازي كان فيه ختم تايلند
    واعطيته لمعقب بعد كتابة وكالة له بتجديد الجواز لي .. ولكن للاسف اختفى المعقب واقفل جواله ولم استطع الاتصال به ,,
    انا عملي يضطرني للسفر بشكل مستمر وبدون جواز ضاع مستقبلي,,
    انا لم ابلغ لحد الان حيث ان الرجل اقفل جواله منذ اسبوع ,, فماهو الحل برأيك هل اذهب للجوازات وابلغهم او اطلب بدل فاقد ولكن اخاف ان تطول العملية حيث اني استطيع احضار من عملي مايثبت ضرورة سفري المستمر ,, فهل ذلك يساعدني في استخراج الجواز في وقت اقل من المتبع عندهم ,, وضعي صعب

    • azzzam قال:

      أخي الفاضل، أشكر مرورك والتواصل، والله مشكلة لكن انصحك اعطي المعقب فرصة يمكن انسرق جوالو او صار لو ظرف. حاول تروح للمكتب اللي قابلت فيه المعقب وتسأل عنو، واذا مر اسبوع ثاني وماجاك أي رد من المعقب انصح تروح لأقرب مركز شرطة وتبلغ ان الجواز انسرق منك وتعطيهم التفاصيل كاملة وتبلغ عن هذا الشخص. اذا قدرت الشرطة تجيب الشخص فشي طيب، وإلا فأنصحك تأخذ بلاغ الشرطة وتقدم على جواز بدل فاقد والله يعينك وبالتوفيق.

  4. ابو شادن قال:

    اخوي عزام مساء الخير عليك ..

    اخوي فقد جواز سفره في بريطانيا وبالتحديد في بريد لندن حيث انه طالب بعثات خادم الحرمين وقام بارسال جواز سفره عن طريق البريد “طبعا قلة خبره” ومن المفترض انه لا يرسل بالبريد العادي حيث وضعه في صندون البريد في احد الشوارع,لارساله لاحدى الشركات الامنيه للتحقق من هويته وذلك لقيامه بالتسجيل لديها في برنامج خدمات مستشفيات , الجواز الان له اكثر من 4 اشهر مفقود وقد اعطته السفاره ورقه مرور الى السعوديه لاتمام اجراءات الجواز , السؤال هو هل سوف يتساهلون معه في الموضوع ويستخرجون جواز بدل فاقد له , مع العلم ان دراسته سوف تبدا بعد شهر من الان تقريبا..
    ولكم جزيل الشكر

    • azzzam قال:

      مساء النور أخي الفاضل. على حد علمي بالبريد في لندن انه افضل من هذا المستوى لكن الله يعين. أهم شي اذا معاه ما يثبت كلامه مثل تقرير ابلاغ من الشرطة عن ضياع الجواز او ماشابه ليساعده على استخراج البدل. ايضا يرفق قرار الابتعاث أو ورقة من الجامعة تثبت وقت بداية الدراسة ليتم التساهل في معاملتة من قبل الجوازات. وبالتوفيق

  5. ابو شادن قال:

    بارك الله فيك يا اخي..وشكرا لك

  6. العتيبي قال:

    سوال فيه عقوبة منع سفر اذا اول مره اضياعه

    • azzzam قال:

      حياك الله .. الحقيقة موضوع العقوبة يرجع الى المحقق فاذا اقتنع بعذر الضياع فلا يوجد عقوبة سفر اما اذا تبين ان ضياع الجواز باهمال صاحب الجواز فهناك الغرامة ومنع السفر
      والمعذرة على الاطالة

  7. azzzam قال:

    ياهلا أخي ابو شادن والمعذرة على الاطاله .. استخراج جواز بديل اول مرة مافيه غرامة منع سفر اذا كان ضياع الجواز من غير اهمال اي انسرق او غيره واذا لديك اي استفسار ثاني حاضرين

  8. عزو قال:

    الله يعطيك العافية
    طيب اللي ولده قطع الجواز ايش يصير

    • azzzam قال:

      حياك الله أخ عزو .. والله لو انا مكانك حافظ عليه حتى لو كان مقطع وحاول تسعى في اصدار بدل فاقد ووقت ماتروح للشخص المسئول وريه الجواز وان شاء الله خير. وكذا افضل من اللي ضاع جوازه لانه موجود معك ويثبت صحة كلامك ومعذور.

      اتمنى اكون افدك

  9. تركي قال:

    السلام عليكم :
    أخواني أنا طالب في بريطانيا وفقدت جوازي والسبب الجامعه اللي ادرس فيها والمدينه لم أجد سكن في أي مكان حتى أجبرت أن أسكن في فندق وليس فندق واحد بل أكثر من فندق وكثرت التنقلات من فندف الى فندق لهذا السبب فقدت جوازي …السؤال : ماهي الاجراأات اللازمه لأصدار بدل فاقد وإلغاء الاول و إصداره وانا في بريطانيا ؟؟؟ولكم تحياتي

    • azzzam قال:

      أخ تركي .. كثرة التنقلات ليست عذر في اضاعة الجواز والله يعينك ويسهل امورك .. ارى زيارة الملحق الثقافي في لندن (www.uksacb.org) ومعك بلاغ او اي ورقة من الشرطة انك فقدت الجواز وصورة شخصية واصدار مايسمى بتذكرة مرور تكون بديل للجواز وقت تواجدك داخل بريطانيا وحال العودة الى الوطن اصدار جواز بدل فاقد والاجراءات بالتفصيل في المقال الذي كتبت والله الموفق

  10. كيف اقدر اطلع جواز سفر المدرسة طلبوا مني الجواز وانا سعودي وكم المبلغ

    وشكرا

  11. ahmedazzam قال:

    موضوع جميل ومفيد شكرا لك

  12. سعود قال:

    السلام عليكم ورحمة الله وبركاته….

    اخي الكريم انا نسيا وين حطيت جوازي ودورة عليه ماحصلته

    وعندي سفريات مهمه هل اطلع بدل فاقد

    وماذا اقووووول للمحقق

    • azzzam قال:

      حياك الله أخ سعود .. الحقيقة انا حرصت اكثر على الجواز بعد ما مريت على اجراء اصدار جواز بديل لأن الاجراء طويل ومعقد .. عموما انصحك بالبحث جيدا واذا مالقيت الله يعينك تبلغ انه ضاع منك وشوف الموضوع والرودو السابقة وبالتوفيق

  13. تركي قال:

    انا واجهتي مشكلة وذكرتها سابقا في هذه المدونة التي نشكر صاحبها عزام جزيل الشكر على انشائها ,, حيثكن عندي ختم تايلند ,,,
    اليكم ماحصل لإفادة الاخوان بالنسبة لمن ضاع جوازه او فيه ختم غير مرغوب به او اي سبب اخر …
    اول حل واخر حل هو : لابد ان تعرف احد بالجوازات او عرف من له واسطه بالجوازات ,, صدقني لن تمشي معاملتك بالوجه الذي تريده وبالسرعه المرادة بدون ماتعرف احد ,,, انا الحمدلله اني عرفت شخص وانقذني من المصيبة ,,, الاجراءات صعبه جدا جدا ,, وصدقني من يمشي بالنظام عندنا يتعب ولن تسير اموره بالشكل الذي يريده .. واسطة واسطة واسطة

  14. عديل لروح قال:

    اخي الكريم..
    سؤالي لك كم المدة الى أخذتها الاجراءات الي عملتها
    أنا جواز سفري مفقود وراح اقدم على بدل فاقد بس أخاف تطول المده ..وعندي سفره مهمه
    وجزاك الله خير على سرد جميع التفاصيل لنا

    • azzzam قال:

      والله يالغالي قدمت طلب جواز بديل في منتصف رمضان واستلمت الجواز الجديد بداية ذي العقدة طبعا لا تحسب اجازة عيد الفطر .. نقول شهر الى شهرين .. والله الموفق

  15. حياك الله اخي انا جوازي معي ولم يفقد مني بفضل الله من قبل ولكن ف جوازات المطار بلغوني ان هناك بلاغ بالسرقة والفقدان وبالتالي ما سافرت واقلعت الطائرة والسؤال كيف حدث هذا الامر ؟

    • azzzam قال:

      الله يحيك يالغالي .. والله المشكلة !! .. ممكن اللي صار ان الجوازات غيرو حالة الجواز في النظام الى مسروق او مفقود عن طريق الخطأ .. وعموما اذا ماحليت المشكلة ممكن تمر جوازات الرياض وتطلع للدور الأول للصالة الثانية حقت فقدان الجواز واذا دخلت اخر مكتب على اليسار جنب مكتب الاتصالات الادارية واستفسر عن حالة الجواز هناك

  16. احمد قال:

    السلام عليكم
    والله اني في مصيبة انا جوازي ضاع وسأبدأ باجرءات الجوزات
    انا مشكلتي انا لازم اطلع في اقرب وقت لاني اريد الابتعاث على برنامج الملك عبد الله والله اذا ما طلعت على البعثة راح افصل من الجامعة . والمشكلة خايف اني امنع من السفر وهذا الي خايف منه ياليت الفزعة والي يعرف معقب يخرجني من هذا المازق وله المبلغ الي يطلبه انا خلاص حتى الاكل ضعقت شهيتي وحالتي النفسية سيئة بسبب هذا الموضوع

    زهذه اول مرة اضيع الجواز طيب وش تنصحني اسوي حتى اطلع بدل فاقد في اقرب وقت اذا سألوني في التحقيق وش اقول وش اكتب حتى لا يعتبروه اهمال

  17. سلمان قال:

    السلام عليكم
    اخواني انا طالب مبتعث وكتب الله علي ان الجواز يضيع علي
    ورحت السفاره ونسيت اسالهم ايش الاوراق الي اجيبها معي لسعوديه عشان اجراءت الجواز او تذكره المرور تكفي الي اعطونياها
    واتمنى الرد بسرعه وجزاكم الله الف خير

    • azzzam قال:

      بالنسبة للأوراق اخي الكريم الموضوع اللي كتبته شامل ومفصل .. طبعا تذكرة المرور راح تسحب عند جوازات المطار وترسل للجوازات خلال اسبوع .. بالنسبة لاجراءات اصدار بدل الفاقد راح تحتاج الهوية مع الصور الشخصية والنماذج تعبيها بالجوازات … وبالتوفيق

  18. أبو أنس قال:

    السلام عليكم

    أشكرك أخوي… على موضوعك الرائعة اللي نحتاجه ونحن ندعو لك بظهر الغيب …

    إستفساري هو:
    أنا طالب أدرس بالهند .. ومعي زوجتي وبنتي … سرقت شنطتي الشخصية وبها جميع الجوازات…

    فمالحل وأنا لا زلت في الهند … سرقت اليوم الصباح.

    • azzzam قال:

      حياك الله اخي ابو انس واتمنى لك دوام التوفيق والسعادة

      قبل كل شي أبغاك تطمن ان ما صار الا كل خير واهم شي انك والأهل بخير ولا تشيل اي هم

      اطلع لأقرب مركز امن او شرطة وبلغ عن عملية السرقة وخذ تقرير بالسرقة لكل جواز واطلع للملحقات الثقافي او القنصل السعودي والشباب هناك ماراح يقصرو معاك وهم موجودين لمساعدة السعوديين

      اتمنى اكون ساعدك واذا تحتاج اي شي لا تتردد

  19. ابو نواف قال:

    السلام عليكم
    انا موضوعي مختلف شوي واتمنى المساعده
    قبل 10 سنوات تقريبا كان فيه قضية تخصني في المباحث الادارية
    ولما انتهى الموضوع طلبوا جواز السفر خوف من سفري المهم لم يحكم في الموضوع ولم يصدر اي شيء ولاكن على كلامهم انه توجه الموضوع للحقوق المدنية .
    المهم بعد 10 سنوات احتجت للسفر ورحت لهم في بعد عيد الفطر السابق و كتبت معروض بالموضوع وللاسف ما فيه اي تعاون منهم
    وللاسف وقت ما كنت عندهم طلبت يعطوني وصل باستلام الجواز لاكنهم رفضو واليوم ما عطوني اي اجابة او اي خطاب يفيد بوجود الجواز عندهم او تم تحويلة لاي جهه او يعطوني الجواز

    وش العمل احتاج جواز سفر بديل وشكرا

    • azzzam قال:

      وعليكم السلام والرحمة .. والله ياغالي الحقيقة ماعندي اي فكرة والله ..

      ممكن تروح للجوازات وتحاول تستخرج بدل فاقد لكن ماعندي فكرة اذا راح تمشي امورك. الظاهر لازم تروح تستفسر من الحقوق المدنية على كلامك. بالتوفيق ياغالي والله يسهل امورك

  20. محمد قال:

    وسأكون ممتنا للغاية إذا كنت تستطيع مساعدتي. أنا مواطن سعودي وأنا أعيش في قطر. لقد فقدت جواز سفري قبل اسبوع وفعلت كل ورقة العمل التي يجب القيام به هنا. بعد وصولي الى المملكة وإذا كان لدي مسألة ملحة أن أعود إلى هنا في قطر، فإنها يمكن أن إصدار جواز سفر مؤقت؟ وكم من الوقت يستغرق?
    شكرا جزيلا

    • azzzam قال:

      حياك الله ومشكور على مرورك .. موضوع جواز سفر مؤقت هذا غير موجود لكن ممكن تاخذ معك للجوازات مايثبت وتقابل مدير او شخص مسؤول في قسم الجواز السعودي وتشرح وضعك وان شاء الله يساعدك في استخراج الجواز في وقت اسرع. حالات ممكن زي الطلاب المبتعثين بحكم انو لابد يسافر عشان يلحق الدراسة ومايروح عليه الفصل الدراسي يتساعدون معاه في الغالب … اتمنى اني افدتك اخي الفاضل والمعذرة على التأخير … وبالتوفيق

  21. السلام عليكم اخووووي ابي استفسار الله لا يهينك
    الحين اذا ضاع الجواز وحصله احد واذا كان واحد اهل الخير ووصله للشرطه او الجوازات … الحين الجوازات او الشرطه اذا وصل عندهم مايتصلون ؟؟ ولا ينتظرون

    • azzzam قال:

      حياك الله ياطيب ومشكور على مرورك .. اذا احد حصل الجواز وسلمه للشرطة هنا داخل المملكة يصير تروح ان للشرطة في مكان ماضاع الجواز وتسأل اذا جاهم شي .. واذا ماحصل اطلع لجوازات الرياض ومر على قسم الجواز المفقود ويحولك على قسم الأرشيف بالبدروم في مبنى جوازات الرياض .. فإن كان جوازك وصلهم راح تحصلو عندهم بالأرشيف .. اتمنى اني افدك وبالتوفيق يالطيب

  22. ابو بندر قال:

    اخوي عزام كيفك
    انا ياطويل العمر جوازي تالف قبل اكثر من خمس سنين وفي نفس الوقت ينتهي في 2005 الوالده الله يخليها غسلت الملابس وراح الجواز ضحية ومن زود رداة الحظ عقبها بأسبوع واحدن من البزارين مخمخ على الباقي من الجواز وانهاه ونا عقبها منحاس اروح للجوازات طيب كيف يبي يصدقوني وفوق هذا الجواز الحين منتهي له مده انا مدري كيف هل يبي يمشي وضعي ولا بتتعقد ياليت حل شافي وكافي انا ماكنت بحاجه للسفر ذيك الايام بس الحين محدوود اذا تقدر افزع لي بالي تقدر عليه
    وتسلم

    • azzzam قال:

      حياك ابو بندر .. الحقيقة مشورة الجوازات علمتني ان لما يصير اي شي في الجواز تاخذو وتروح لهم .. وعموما ماحصل الا خير ان شاء الله
      انا رأيي اذا الجواز عندك خذو زي ماهو وقابل فيه الرائد المسئول في صالة فقدان الجواز وهو اللي راح يفيدكز موضوع ان الجواز تالف عندك ومنتهي هو في صالحك ان شاء الله .. وانت افضل من اللي انسرق جوازه
      شوف يوم ومر عليهم والله يوفقك ويسهل امورك

  23. ابو بندر قال:

    تسلم ياعزام
    المشكله انه تالف ومابقى منه شي ولا لو باقي منه شي كان هانت المشكله
    الحين لامعي لاجواز ولا رقمه هنا المشكله
    انا ودي بس اعرف رقم الجواز وعقبها ربك يعني
    وفي النهاية اشكر لك الرد اخوي
    لاهنت

    • azzzam قال:

      الله يسلمك

      بالنسبة لرقم الجواز فهذي بسيطة .. اي من الأخوان في الجوازات من قسم تجديد الجواز السعودي او قسم البدل الفاقد ممكن يشيك المعلومة هذي عن طريق رقم السجل المدني. بالتوفيق والله يسهل امورك ياطيب

  24. ابو مشعل قال:

    اخوي عزام ، انا ذهبت للجوازات وسويت كامل الاجراءات وابلغوني بمراجعة المديرية العامة للجوازات بعد اسبوع فقط واشيك معهم بالاسم بدون لايعطوني اي رقم مراجعة ، الشي الثاني في نفس الورقة الخاصة بقرار اللجنة شفت المحقق كتب فقط غرامة 500 ريال ، مادري وش معنى هذا ، وحسب المعلومات الي وصلتني من بعض الزملاء انه تغير النظام وماعاد فيه منع من السفر ، فقط غرامة وخلاص ، ممكن تفيدني اذا عندك خبرة عن النظام هذا

    تحياتي

    • azzzam قال:

      حياك الله ابو مشعل .. بالنسبة لمراجعة المديرية العامة للجوازات فالظاهر ان اسبوع يمكن مايمدي المعاملة توصل لكن مايمنع انك تراجع اذا فضيت. والمراجعة تكون بالإسم وتأكد انك تثبت التاريخ لأن الموظف في المديرية يمكن يسألك عن التاريخ. بالنسبة للغرامة تذهب إلى البنك تبعك لإصدار شيك مصرفي باسم مؤسسة النقد العربي السعودي بقيمة الغرامة وتعطية للجوازات. ومالظاهر في منع من السفر اذا تم تحديد المخالفة على حد علمي. بالتوفيق ياغالي

  25. تشكر على هذه الصفحه قال:

    السلام عليكم ورحمة الله وبركاته

    الاخ عزام

    انا انسرق جوازي بالسياره (جواز السفر) ورحت ابي اطلع الجديد
    وسويت كل الاجرائات اللازمه واعطوني موعد بعد ال4 اشهر اراجعهم

    يعني في الاحد (24 رجب) ميعاد المراجعه للنظر في الامر وانا عندي رحله مهمه جدا في 1 شعبان

    بخبرتك هل يمديني الحق عليها والا لا؟؟

    • azzzam قال:

      وعليكم السلام ورحمة الله وبركاته

      المعذرة ياطيب انشغلت الفترة الماضية ولا امداني اشوف استفسارك. اتمنى ان امورك اتسهلت وبالتوفيق ان شاء الله وممكن تشاركنا باليصير معاك.

      تحياتي

  26. ابو مشعل قال:

    يعطيمك العافية اخوي عزام ، روح اراجع المديرية الاسبوع الجاي واشوف وش اخر الموضوع

    شكرا على تعاونك

  27. بيطري بطران قال:

    أخي العزيز عزام
    أنا واحد كنت حاط جوازي بدرج مكتبي بغرفتي ألي مايدخلها غيري. ومتأكد ميه بالميه أن جوازي بالدرج. وأشيك ذاك اليوم لما حبيت أسافر لدبي أنا وربعي بأن الجواز مو موجود. طبعا الحمد لله إني قدرت أسافر لهناك بالهويه الوطنيه. وإلا كان علوم. بس المشكله الآن بأني ما أدري وين طار هالجواز قلبت الغرفه عليه قلب ومالقيته؟
    فلما أروح للجوازات لإصدار بدل فاقد كيف أجيب لهم بلاغ من الشرطه بأن الجواز مسروق أساسا.
    وجزيت خيرا مشكورا.

    • azzzam قال:

      حياك الله اخي

      افتح بلاغ مع الشرطة باللي صار. اذا انت شاك مثلا في احد دخل الغرفة يعني الخدامة مثلا وبلغ الشرطة باللي صار. ورقة الشرطة مهمة واذا تعرف معقب او واحد في الجوازات يسهل لك الأمور. اتمنى اكون افدت وبالتوفيق ان شاء الله.

  28. أبو أحمد قال:

    السلام عليكم …
    أخي عزام ..
    حبيت استفسر عن اجرائات فقدان الجواز في جدةهل يلزم الذهاب لجوازات الرياض أم جميع
    الاجرائات تتم في جدة …

    • azzzam قال:

      وعليكم السلام ورحمة الله

      فيما يخص مراجعة الجوازات فإذا كان جوازك اصدار جوازات جدة فأكيد تبدأ الاجراء من جوازات جدة ومن هناك هم يبلغوك اذا في داعي تجي لمديرية الجوازات بالرياض او لأ.

      اتمنى اني افدك وبالتوفيق يالغالي

  29. نوف قال:

    السلام عليكم

    انا يااخوي الغالي تملكت واخذ زوجي جوازي للسفر ولكن لم استطع الاكمال معه في مسألة الزواج

    واحاول منذ سنة ان اتطلق منه ومعه جوازي ، ولم يرضى ان يعطينيا اياه

    ماذا علي ان افعل ، وخاصة ان والدي دائما يسافر مع العمل ويأخذنا معه والان ابي في حسرة بسببي ؟

    • azzzam قال:

      وعليكم السلام ورحمة الله .. والله ياأختي الله يسهل أمرك ويختارلك الأصلح

      والله الحقيقة لا يوجد حل واضح. حتى لو كان في محاولة لاصدار جواز بدل فاقد فزوجك هو اللي الوحيد اللي يقدر يسويه أو من يوكل عنه بوكالة شرعية.

      المعذرة اني ماقدرت افيدك والله يوفقك لكل خير

    • طموحة قال:

      انا نفس مشكلتك,, كنت متزوجة وتطلقت وطليقي محتجز الجواز’’ ورافض تسليمنا اليه ,, والدي بلغ الشرطة,, وعند التحقيق معه نكر وجود الجواز عنده وادعى انني اخذته,,, المهم انا لدي بعثة واخاف ان لا يمديني استخراج جواز قبل بداية الدراسة…

  30. منى قال:

    السلام عليكم و رحمة الله و بركاته..
    الأخ عزام، جزاك الله خير الجزاء على نشر تجربتك مع الجوازات لتعم الفائدة..

    أنا طالبة مبتعثة في بريطانيا، و قد سرقت حقيبتي من يدي عنوة في لندن، و هي مدينة اشتهرت بالسرقة، جوازي، و أهم ما أملك كان في الحقيبة، و كانت خسارتي فاااادحة مادياً و معنوياً..
    انتظرت شهراً على أمل أن يسلم جوازي إلى الشرطة أو إلى السفارة، و لكن دون جدوى،، و الحمد لله على كل حال.. اللهم أجرني في مصيبتي و اخلف لي خيراً منها.. اصدرت تذكرة العودة من السفارة و عدت إلى السعودي و استلمت محضر مراجعة الجوازات من المطار..

    أنا الآن عندي بلاغ من الشرطة البريطانية و إفادة من الملحقية بأني طالبة، لكن مشكلي هي أنني لا أستطيع أن أذهب إلى الجوازات بنفسي للقيام بالإجراءات.. والدي مسن و مريض و عاجز عن القيام بذلك، أما أخي و هو من يملك وكالة من والدي فهو كسول جدا بشكل عام و (يفقع المرارة ببروده)، إضافة إلى أنه لم يكن موافقاً تماماً على ابتعاثي، و هذه هي فرصته ليقف في طريقي.. ما الحل؟ كيف أتصرف و أنا كإمرأة هويتي لا قيمة لها بدون “ولي أمري”؟ هل التعامل مع معقب ممكن أن يساعدني؟ علماً بأني لا أفضل ذلك حيث أن لي تجربة سيئة مع المعقبين.. أريد حلاً عاجلاً جزاكم الله خيراً..
    حسبنا الله و نعم الوكيل

    • azzzam قال:

      وعليكم السلام ورحمة الله وبركاته وعيدكم مبارك

      المعذرة على التأخير لأني كنت مسافر في رمضان

      ان شاء الله ماصار الى خير .. والله يعينك الحقيقة .. باختصار لابد من تجلسي مع اخوكي وتقنعيه ومافي مانع حتى لو تعطيه مكافئه على التعب .. او المعقب وان شاء الله فيهم من هدى الله يساعدك في هذا الموضوع.
      ماساعدتك لكن ادعيلك الله يوفقك ويسهل أمرك وبالتوفيق

  31. منى قال:

    جزاك الله خيراً أستاذ عزام، نذكرت أن ابن أختي و هو مرافقي في البعثة لديه صك وكالة شرعية من أبي لينوب عنه في “ولاية أمري” و استفدت و لله الحمد من هذه النقطة و راجع هو الجوازات بصفته “ولي أمري”.. المشكلة أنهم أعطوه موعد للمراجعة بعد ثلاثة أشهر مما يعني ضياع فصل دراسي بأكمله بانتظار اتمام إجراءات الجواز، مع العلم إنهم رفضوا أخذ إفادة الملحقية مني بحجة أنها ليست من الأوراق المطلوبة!! هل من سبيل لتسريع الإجراءات؟؟

  32. السلام عليكم ورحمة الله
    الله يسعدك ودي اسألك
    انا كنت متزوجه وانفصلت وكان جوزاي مع طليقي يوم اتصلت عليه عشان يرجعه قال ماهو عندي وانه ضيعه
    واللحين جوازي منتهي من فتره طويله
    المشكله مو عارفه ايش اسوي
    ايش اقول لهم بالضبط عشان يسهلون الامر علي
    الله يوفقك قول لي ايش الحل
    ربي يجزاك الف خير

    • azzzam قال:

      وعليكم السلام ورحمة الله وبركاته .. اذا حصل طلاق وموجود عندك الصك معناته انو تمت رجع اسمك الى كرت العائلة الخاص بالوالد. وهذا يعني ان الوالد او من ينوب عنه من اخوانك يقدر يروح يطلع جواز بدل فاقد من غير اي مشكلة ووقت التحقيق قولي اللي صار ان زوجك السابق مضيعه وان شاء الله تمشي امورك. المشكلة الوحيدة ان الاجراء ياخذ وقت لكن باقي الأمور راح تمشي. اتمنى اكون افدك والله يسهل امورك وامور المسلمين.

  33. azzzam قال:

    السلام عليكم ورحمته الله وبركاته .. أخواني اذا ما أكلف عليكم اتمنى منكم مشاركتنا التجربة اللي تمرون فيها في مكتب الجوازات وخاصة موضوع اصدار بدل فاقد حتى يصير نطور الصفحة بطريقة معينة ونفيد عدد أكبر.

    جزاكم الله خير

    تحياتي
    عزام

  34. mr.nawaf قال:

    السلام عليكم
    اخي العزيز عزام انا سافرت الى دبي وفقدت جوازي عند المطعم كان في جيبي واختفى مني تماما وخلصت اجراتي بدبي وعطوني ورقة خروج من السفاره تذكره وعطوني جوازات الملك خالد ورقة مراجعه لجوزات الرياض والا الان مارجعت ولاادري ماهي الاجراءت وايغى اطلع جواز سفر لانو عندي سفره بالجازه الصيفيه دراسه بلندن ولا ادري بيطعوني جواز او لا وانا سمعت ان العقوبه سنتين مافيه سسفر وانا مامر علي حتى اربع شهور اقدر اطلع جواز ولا لا ارجاء الرد على سوالي وشكرا

    • azzzam قال:

      الحمدلله على السلامة .. نصيحتي لك تراجع جوازات الرياض في اقرب وقت لأن الإجراء كامل سيأخذ منك مدة ممكن توصل الى شهرين. انا متأكد ان المعاملة تبعك واقفة عند مكتب الصادر في قسم (فقدان الجواز) فلابد انك تمر عليهم. واذا كان هذا اول جواز يضيع وكان تبريرك واضح فماراح يكون في منع من السفر لكن في غرامة. بالنسبة للاجراء بالتفصيل فهو مكتوب في المدونة واتمنى انها تفيدك. حسب علمي ماتغير الاجراء

      تحياتي

  35. mr.nawaf قال:

    مشكور اخوووووووي الله يوفقك

  36. MANS قال:

    مشكووور اخوي عزااااام ..
    الحمدلله انا ما ضيعت الجواز .. ومقفل عليه بالتجوري

  37. MR.THAMER قال:

    سلام عليكم , انا رجعت من اوروبا وعطيت جوازي لامي وبعد 4 شهور جيت ادوره مالقيته

    وش الحل , ماالعمل ومالعقوبة ومالعذر

    • azzzam قال:

      اهلا أخ ثامر والمعذرة على التأخير بالرد .. دور مظبوط واذا ما حصلت فالأفضل تبلغ الشرطة وتقلهم انك كنت تنقل اغراضك مثلا وضاع الجواز وتاخد منهم بلاغ وتطلع للجوازات وتبدأ معاملة استخراج جواز بدل فاقد. الله يوفقك ويسهل أمرك

  38. mohammed قال:

    السلام عليكم ورحمه الله وبركاته

    يعطيك العافيه أخوي عزاام

    أنا جوازي عليه ختم تايلند ,, وجوازي على وشك أنه ينتهي ,, أيش الحل برأيك لتجديد الجواز

    وما هي العقوبات للسفر الى تايلند

    • azzzam قال:

      ياهلا أخ محمد والمعذرة على التأخير بالرد .. الحقيقة ختم تايلند مدري والله ايش اقلك .. كثير من الزملاء جددو جوازاتهم وماكان في تدقيق من موظف الجوازات ومشيت امورهم وبعضهم لا والله يسألوهم عن سبب السفر وغيرو يعني تحقيق سريع. اذا تعرف معقب يمكن يساعدك وبالتوفيق ان شاء الله

  39. محمد قال:

    السلام عليكم اخوي عزام انا حاليا فقدت جوازي ووصلت لمرحله المديريه العامه بس ما رحت لهم يعني صار هالكلام من امس حقق معي المحقق وارسلو اوراقي للمديريه بس الغريب بالموضوع ما عطاني المحقق رقم للمعامله عشان اراجع فيها المديريه هل ارجع للمحقق او اني اذا رحت للمديريه ما يحتاج رقم يطلعونه من رقم سجلي المدني ومتى اروح لهم والله يوفقك يارب دنيا واخره ارجو الرد قريبا

    • azzzam قال:

      المعذرة ياأخواني الحقيقة سافرت بالصيف والحمدلله رجعت. أخويا محمد اعتذر منك على التأخير واتمنى أمورك انحلت لكن اذا لسه فالله يسهلك تروح للمديرية بالاسم ورقم السجل المدني وانا صار معاي نفس الكلام وراجعتهم بالبطاقة. اعتذر مره ثانية على التأخير والله يسهل امورك

  40. ابوعبدالله قال:

    الله يجزاك خير اخوي عزام على افادتك اخوانك ونصحك وارشادك يسر الله امرك وفرج همك ورزقك من حيث لا تحتسب

  41. salem قال:

    السلام عليكم اخي الكريم انا الله يسلمك طالع ادرس بره بعد شهرين تقريبا جوازي ضاع مادري هو انسرق او ضاع علي بمكان والله مدري وش اسوي اقدم لهم انه ضاع ولا نسرق ياريت تساعدي الله يجزاك خير

    • azzzam قال:

      وعليكم السلام ورحمة الله .. اتمنى لك التوفيق والسداد .. في جميع الحالات لابد تروح لأقرب فرق للشرطة وتبلغهم اذا الموضوع سرقة فيها تساؤلات زيادة فمن الممكن تبلغ ان ضاع منك وتاخد منهم بلاغ وتروح للجوازات. في الجوازات حاول توضح لهم انك مرتبط بدراسة في الخارج وان شاء الله يصدر الجواز في وقت اسرع شوي. لا تنسى تأشيرة الدراسة اذا البلد اللي انت رايحلة يحتاج والله يسهل امورك.

  42. faysah قال:

    استاذي الكريم جعل الله في ميزان حسناتك في كل ما تفعله لنا من مساعدة . باختصار شديد انتهى تاريخ الجواز سفري في انكلترا ورحت للقنصلية واعطوني تذكرة مرور لما وصلت لمطار جدة سألوني عن جوازي المنتهي فقلت لهم خلاص هو منتهي وثانيا القنصلية ماقالت لي خذي معاكي لجدة في ماحسيت انو ضروري احتفظ به لانه كان مخروم يعني غير صالح المهم شافو جواز تذكرة المرور وخلوني امر ومااخذو الجواز تذكرة المرور مني فالى الان هو معي المشكلة ابس اسافر لدبي هذي السنة وصورة تذكرة المرور انتزعت بطريق الخطأ لانها ماكانت ثابت بالاول من القنصلية المهم معاي الصورة وتذكرة المرور ارجو الافادة ولك الشكر والتحية

    • azzzam قال:

      جزاك الله خير. الحقيقة ما فهمت وضع الجواز اللي معاكي ايش؟. في حال كان الجواز المنتهي او القديم موجود معاكي فسددي الرسوم وجددي الجواز بشكل طبيعي جداً. واذا كان الجواز المنتهي بالخارج فمن الافضل تدبري احد يجيبو لان الحقيقة اذا الجواز غير موجود فالله يعينك راح تضطري الى اصدار بدل فاقد وهذا إجراءاته تتطول وفيه غرامة طبعا. وبالنسبة لورقة المرور فهي وثيقة ترجعي فيها للمملكة فقط ولا تستخدم للخروج أبدا.

      أتمنى ان اكون قد أفدتك

  43. عهود محمد قال:

    السلام عليكم اخووي استفسار كم مدة الجواز المسروق يعني كم ياخد فتره ويطلع وشكررا

    • azzzam قال:

      وعليكم السلام ورحمة الله وبركاته. الفترة على حسب علمي ماهي ثابتة، يعني في حال كانت اول مرة تصير المدة تقريبا حدود شهرين اللي هي بالغالب المدة المطلوبة للمعالملة من البداية الى النهاية. اما اذا كان فقد الجواز اكثر من مرة بالتالي ممكن يترتب عليها غرامة منع سفر لمدة معينة. الله يعينك ويسهل امورك

  44. عهود محمد قال:

    الف شكر اخوي ع الرد
    وع كل حال الله يعين ان شاءالله يطلع قريب ومايطول

  45. zaidm قال:

    السلام عليكم,
    الحقيقة انا استغرب و اتعجب من كثرة التعقيد والتحقيق في فقدان الجواز!!!
    في سابق كان الجواز يسهل تزويرة وستخدامة لا اصبح من المستحيل تغيير او وضع صورة بدلة فيه. يعني التقنية تحدثت وتطورة لكن نفس الاجراء و طريقة التعامل لم تتغير :(
    لا بد من رفع هذا الموضوع ( اي تعقيد وتاخير اصدار جواز سفر بدل فاقد) الى الاعلام والى ولاة الامر.
    هل يعقل ان افقد جوازي و انتظر شهرين؟؟؟

    طبعا في حالة عدم وجود واسطة

  46. A قال:

    هلا اخوي بيض الله وجهك ماقصرت بالنسبة فقدان هل لازم دفع رسوم غرامة ام لا

    • azzzam قال:

      وجهك ابيض يالغالي. مافهمت سؤالك لكن اذا قصدك هل لازم تقر غرامة فالغالب نعم. واذا كان السؤال هل لابد من دفع الغرامة فأكيد لاستكمال اجراءات استخراج جواز السفر الجديد. اتمنى اكون افدك ياطيب.

      • salem قال:

        السلام عليكم الحمدلله فبل اسبوع طلعت جوازي الجديد وحبيت افيد اخواني الموجودين انا رحت لهم وعطوني موعد للتحقيق ثاني يوم وجيتهم وسألني كم سوال وقالي تعال بعد شهر تستلمه والحمدلله يوم جيتهم دفعوني غرامة او رسوم 600 ريال واستلمته ثاني يوم توكلو على الله يا خواني وربكم يسهلها باذنه

  47. طموحة قال:

    انا تطلقت وجوازي مع طليقي ونفى وجوده لديه,, فعند التحقيق هل نذكر انه مفقود او مسروق,,, لان السارق معروف وهو الطليق,,,, الا اذا كان قول مسروق يترتب عليه اجراءات اطول ووقت اكثر ,, فساتجنبه لانني مرتبطة ببعثة ولا اريد التاخر عن الدراسة.. ارجو النصيحة وشكرا

    • azzzam قال:

      الله يكون في عونك ويسهل امورك. الافضل ولتسريع الامور خلال التحقيق تقولي ان الجواز ضاع لتلافي التعقيدات اللي ممكن تصير خاصة انك مرتبطة بالبعثة للدراسة. أتمنى اكون افدتك وبالتوفيق

  48. 112233 قال:

    السلام عليكم .. انا فقدت جوازي ومنتهي من 10 سنوات وتوني افقده هل / ياتي لي منع سفر او غرامه لاني ابي اطلع برا ل الدراسه ..

    • azzzam قال:

      وعليكم السلام ورحمة الله وبركاته. موضوع ان الجواز منتهي ليس له علاقة لكن في جميع الأحوال افضل من الجواز المفقود اللي ما انتهي. نصيحتي ياطيب خلي معاك نسخة من اوراق الجامعة او قبول الجامعة او اذا امكن قرار ابتعاث وارفقه مع المعاملة وبالتالي يساعدوك الجوازات من ناحية الوقت. واذا تعرف احد او معقب يسهل الأمور اكثر. بالتوفيق واتمنى اني افدت.

  49. ابو عابد قال:

    انا ضايع جوازي وحققو معي وعطوني منع السفر 6 اشهور وغرامه 1000 اعرف رجل بيطلع جواز سفريه واحده ابي استفسر لبد احدد الدوله ولا اي دوله اروحلها يعني يعطين جواز سفر واحد واروح اي دوله على كيفي من

    • azzzam قال:

      والله يالغالي ماعندي اي فكرة عن جواز لسفرية واحدة. بالنسبة لدول الخليج الظاهر ممكن تستخدم الهوية الوطنية في السفر. بالتوفيق

  50. الموضوع اني فقت شنطتي وانا مسافر من صبيا الي جدة كانت مع الشنط فوق السيارة ويوم وصلت استراحة قرب اليث الا والحبل كان نازل وشاهت ان شنطة مفقودة رجعت اقرب مركز ابلغ قلولي الصباح مع الدوام فطريت ارجع من اليث حتي صبيا وامشي واسأل في الطريق حتي المركز حتي وصلت صبيا وذهبت الجوازات وابلغتهم عن فقدان الشنطة وفيها اغراضي ومن ضمنها جواز السفر ولا اليوم لا يوجد رد لي حول الشهر واطلب من حصل علي الجواز الاتصال علي الارقام التالية 0569719749 او0590557361 وياليت تنشروان اعلاني علي معرفتكم الفقدان صار علي خط الساحل صبياء – اليث وانا انسان كبير في السن واطلب المساعدة وشكر

    • الموضوع اني فقت شنطتي وانا مسافر من صبيا الي جدة كانت مع الشنط فوق السيارة ويوم وصلت استراحة قرب اليث الا والحبل كان نازل وشاهت ان شنطة مفقودة رجعت اقرب مركز ابلغ قلولي الصباح مع الدوام فطريت ارجع من اليث حتي صبيا وامشي واسأل في الطريق حتي المركز حتي وصلت صبيا وذهبت الجوازات وابلغتهم عن فقدان الشنطة وفيها اغراضي ومن ضمنها جواز السفر ولا اليوم لا يوجد رد لي حول الشهر واطلب من حصل علي الجواز الاتصال علي الارقام التالية 0569719749 او0590557361 وياليت تنشروان اعلاني علي معرفتكم الفقدان صار علي خط الساحل صبياء – اليث وانا انسان كبير في السن واطلب المساعدة وشكر

      • azzzam قال:

        الله يعينك ويساعدك ويسخرلك الطيبين والله يسهل لك امور الجواز وبالتوفيق.

      • Om ali قال:

        ممكن خدمة لاهنت
        المطلقة من موظف بالخارجية وجواز سفرها كان خاص يتبع عمله بعد الطلاق اخذ الجواز وهي لاتعرف رقمه
        ماذا تفعل ؟؟؟ بتطلع جواز سفر عادي ؟؟؟
        ارجو الرد جزاك الله خير

  51. basmah قال:

    سلام عليكم
    جدتي عندها جواز سفر من حوالى 30 سنه وهو منتهى وقبل فتره قطعت الجواز ورميته والحين بنسافر فالصيف ونبا نطلعلها جواز سفر ايش الاجراءات
    وهل يطول تكفى ساعدنا

    • azzzam قال:

      وعليكم السلام ورحمة الله وبركاته. الله يخليها لكم وان شاء الله. من رأيي ان تسددو الرسوم وتطلعو للجوازات وجهزو نموذج تجديد الجواز مع صورة من الهوية وتتسهل باذن الله. واذا كانت الجده تقوى تروح معكم افضل وان شاء الله مايقصرون ويسرعو الأمور بحكم انها كبيرة بالسن. بالتوفيق

  52. عمر قال:

    فيه شخص خلص اجرانها وقال راجع المكتب ايقول شف نزلت بالحاسواب سري وعطاني رقم المعاملة وين المكتب السري موقعه ولك كل الشكر

  53. محمد قال:

    السلام عليكم انشاء تكونون طيبين اجمعين والله يجزاك الف خير لو سمحت انا عندي مشكله والله يحلها انشاء الله يا طويل العمر قصتي ان امي سعوديه وانا كويتي وامي جات الكويت مع ابووي وضاع جوازها قبل حوالي 7 سنوات والحين حصلت معانا ضروف وامي تبي تطلع بدل فاقد ابيك تفيدني شنو اقول للمحقق لان صراحه 7 سنوات قويه وابيك تقولي هل علينا مشكله ولا قضيه و ايش الاجراءات اللي لازم نتخذها مع العلم ان امي ماا عندها تذكره الدخول وارجو منك ان تفيدني الله يرحم والديك بسرعهه لاني والله مبتلش

    • azzzam قال:

      حياك يالغالي. والله اذا الوالدة الله يحفظها في الكويت الان مر عالسفارة السعودية بالكويت ويساعدوك باذن الله ويعطوك تذكرة مرور الى السعودية. واذا جيت للسعودية الله يسهلك مر على ادارة الجوازات وابدا إجراءات الجواز بدل فاقد وتتسهل باذن الله ومافي اي مشكلة او اي قضية وان شاء الله يتساعدون معكم عشانها الوالدة. أتمنى أني افدتك والله يسهل اموركم

  54. فوفس قال:

    السلام عليكم / الله يعافيك يالغالي انا عندي بلاغ سرقة جواز من السياره من الشرطه ولما رحت الجوازات قالو لي ماينفعك الخطاب هذا لأنه مكتوب بالخطاب حيث لايوجد اثار تكسير وانا بحائل والجواز طلعته من الدمام قالو رح طلعه من الدمام اسرع لك لأن ملفك هناك ومدري اخذ بلاغ الشرطه ولا اخليه ولا جوازات حائل ماعندك احد ولا وش الوضع

    • azzzam قال:

      حياك يالغالي. الحقيقة مافهمت الخطاب اللي اعطوك لكن اذا الجواز مسروق الجوازات تطلب منك تجيب بلاغ من الشرطة. بالنسبة للمكان اللي تطلع منه الجواز الظاهر اسرع تروح لجهة حفظ الجواز افضل. بالتوفيق ياغالي

  55. راح الجواز -خالد -الرياض قال:

    هلا اخوي azzzam لي ثلاث شهور ضايع الجوازي قي البيت او السياره بس مالقيته وكل يوم اقول يمكن القاه بس مالظاهر اني بلقاه ومتردد وبلشان لانها ثاني مره والمنع جاي جاي وبتشجع الاسبوع هذا واشوف بس اخر مجاوله مع زوجته يمكن داسته

  56. السلام عليكم
    أنا ولدي كان يدرس في امريكا العام الماضي ورجع عن طريق مطار الملك خالد يوم عشرين شعبان طبعا كانت فيزته مدتها سنه المهم انه فقد جوازه وهوه يحتاج يقدم على فيزه لمدة خمس سنوات للدراسة في امريكا واحنا من الاحساء لكن فيه واحد نصحني اروح جوازات الرياض وأبدا الاجرآت من هناك اسرع لان ولدي لازم يسافر بعد شهر ونص تقريبا بماذا تنصحني حبيبي

    • azzzam قال:

      وعليكم السلام ورحمة الله وبركاته والمعذرة على التأخر في الرد لأني كنت مسافر. والله يالغالي الظاهر لابد من مراجعه المكتب اللي تم في استخراج الجواز حسب المدينة والمنطقة فإذا كان الجواز السابق من الأحساء لابد تراجعهم والمعاملة يمكن تحول للمديرية العامة للجوازات بالرياض على شارق الفرزدق. الله يسهل أمرك وبالتوفيق.

  57. طلال قال:

    السلام عليكم
    بارك الله فيك انا مشكلتي ان الوالد طلع لي جواز سفر وانا عمري ١٥ سنه وسافرت سفره وحده مع الوالد للكويت ورجعنا وبعد ١٥ سنه رحت للجوازات عشان اطلع جواز جديد قالوا لازم تجيب الجواز القديم طبعا سألت الوالد قال ضايع ،، فصرت ضحية بين الوالد والجوازات ،، برأيك مالحل ؟؟
    جزاك الله خير.

    • azzzam قال:

      وعليكم السلام ورحمة الله وبركاته والمعذرة على التأخر في الرد لأني كنت مسافر. والله يالغالي حسب كلامك لابد تبدأ في اجراءات استخراج جواز بدل فاقد والعملية تكون أسهل بإذن الله اذا كان الجواز منتهي. الله يسهل أمورك

  58. شخص قال:

    السلام عليكم ورحمة الله وبركاته اخوي عزام وجزاك الله خير على هالموضوع …

    انا مشكلتي جوازي منتهي وانا صغير من عام 1413 وعمري 7سنوات يعني 21 سنه وهو منتهي وضايع المهم سافرت مع اهلي اتعالج عند شيخ في اليمن و رجعنا السعوديه ومن بعدها جوازي ضاع وانتهى ولا بلغو عنه اهلي ولاشي والحين ابي استخرج جواز جديد .

    ابي اعرف ايش الاجراءات والطرق اللي اتبعها لاستخراج الجواز وشكرا ؟

    • azzzam قال:

      وعليكم السلام ورحمة الله وبركاته والمعذرة على التأخر في الرد. والله يالغالي حسب كلامك لابد تبدأ في اجراءات استخراج جواز بدل فاقد والعملية تكون أسهل بإذن الله اذا كان الجواز منتهي. وبالنسبة للاجراءات انا كاتبها بالتفصيل في الموضوع. الله يسهل أمورك

  59. asma قال:

    السلام عليكم انا مشكلتي اتسرقت شنطتي وفيها جوازي وجواز الوالده المشكله اني بعد ١٥ يوم كان لازم ارجع السعوديه عشان اغير فيزتي لفيزه طالب وماعندي الا١٥ يوم اجلس في السعوديه وبعدها لازم ارجع دارستي بتبدا مع العلم اني طالبه على حسابي الخاص ايش الحل ؟

    • azzzam قال:

      وعليكم السلام ورحمة الله وبركاته. والله يا أختي انصحك تبلغي الجامعة بالمشكلة حتى اذا رجعتي للسعودية وتأخر اصدار جواز السفر يصير الجامعه عندها خبر بالموضوع وماتحسب عليكي غياب او تساويلك مشكلة. واذا احتجتي الاجراءات شوفي الخطوات اللي كتبتها بالتفصيل. اتمنى لكي التوفيق

  60. asma قال:

    مشكوره الله يعطيك العافيه بس الحمدلله البوليس لقيت الشنطه واللي اخذها ترك الجوازات كثر الله خيرو بكرا ان شاء الله اروح استلمهم
    بس مررره شكرا

  61. ابو فجر قال:

    السلام عليكم ورحمة الله ،،،،
    أخوي عزام بارك الله فيك عل هذا الموضوع انا سلمك الله ضائع جواز سفري وانا طالب مبتعث وباقي علي سفري ١٣ يوم امس حبيت اشيك علي الحجز فرحت أخذ الجواز ما لقيته .. وش أسوي اسمع الناس يقولو لي راح يمنعونك من
    السفر ٣ سنوات ….. وكلام كثيررر ولابد أتواجد في امريكا بعد ١٣ يوم عشان عندي كذا اختبار وش الحل وش أسوي
    انتضر ردك في اقرب فرصه

    • azzzam قال:

      وعليكم السلام ورحمة الله وبركاته .. والله ياغالي اذا سفرك باقي له 13 يوم والله مشكلة .. انصحك كما نصحت الباقين انك تطلع للجوازات ومعاك اوراق دراستك وقرار الابتعاث وعسى يساعدونك ويسهلو الاجراءات .. طيب ايش صار عالتأشيرة حقت دولة الدراسة استخرجتها ؟ بالنسبة لسؤالك عن منع السفر فإذا كان ضياع الجواز اول مره غالبا ان شاء الله مافي منع سفر فقط الغرامة. بالتوفيق والله يسهل امرك

أضف تعليق

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

You are commenting using your WordPress.com account. تسجيل خروج   / تغيير )

Twitter picture

You are commenting using your Twitter account. تسجيل خروج   / تغيير )

Facebook photo

You are commenting using your Facebook account. تسجيل خروج   / تغيير )

Google+ photo

You are commenting using your Google+ account. تسجيل خروج   / تغيير )

Connecting to %s

تابع

Get every new post delivered to your Inbox.

%d bloggers like this: